অসমৰ ৪টা পৰম্পৰাগত সামগ্ৰীয়ে লাভ কৰিলে জি আই টেগ

অসমৰ থলুৱা শিল্প, হস্ততাঁত পৰম্পৰা আৰু সাংস্কৃতিক ঐতিহ্যৰ বাবে এক উল্লেখনীয় সফলতা কঢ়িয়াই আনি ভাৰত চৰকাৰৰ জিঅ’গ্ৰাফীকেল ইণ্ডিকেশ্বন ৰেজিষ্ট্ৰীৰ (Geographical Indications Registry) পৰা ৰাজ্যখনৰ চাৰিটা পৰম্পৰাগত সামগ্ৰীয়ে ভৌগোলিক সূচক বা জি আই (GI) স্বীকৃতি লাভ কৰিছে

নতুনকৈ জিআই টেগ লাভ কৰা এই সামগ্ৰীকেইটা হ’ল—

• কাৰ্বি আংলং হস্ততাঁত সামগ্ৰী (Karbi Anglong Handloom Products)
• অসমৰ বিহু পেপা (Assam Bihu Pepa)
• অসমৰ বাঁহ শিল্প (Assam Bamboo Crafts)
• দেউৰী হস্ততাঁত সামগ্ৰী (Deuri Handloom Products)

এই চৰকাৰী প্ৰমাণপত্ৰই সামগ্ৰীসমূহক আইনী সুৰক্ষা প্ৰদান কৰাৰ লগতে দেশ-বিদেশৰ বজাৰত ইয়াৰ স্বকীয়তা আৰু অৰ্থনৈতিক মূল্য বৃদ্ধি কৰিব বুলি আশা কৰা হৈছে।

সাংস্কৃতিক ঐতিহ্যৰ স্বীকৃতি

এই নতুন সংযোজনকেইটাই অসমৰ পৰম্পৰাগত জ্ঞান ব্যবস্থা, জনজাতীয় বৈচিত্ৰ্যময় বস্ত্ৰশিল্প, বাঁহৰ কাৰুকাৰ্য আৰু বিহুৰ সৈতে ওতপ্ৰোতভাৱে জড়িত আইকনিক বাদ্যযন্ত্ৰটোক প্ৰতিনিধিত্ব কৰিছে। এই সমগ্ৰ জিআই পঞ্জীয়ন প্ৰক্ৰিয়াত ৰাষ্ট্ৰীয় কৃষি আৰু গ্ৰাম্য উন্নয়ন বেংক অৰ্থাৎ নাৱাৰ্ডে (NABARD) সক্ৰিয় সহায় আগবঢ়াইছে। নতুনকৈ অনুমোদন পোৱা এই সামগ্ৰীকেইটাক সামৰি অসমত নাৱাৰ্ডৰ সহযোগত জি আই টেগ লাভ কৰা সৰ্বমুঠ সামগ্ৰীৰ সংখ্যা এতিয়া ১২টালৈ বৃদ্ধি পালে।

সাধাৰণতে কোনো এক নিৰ্দিষ্ট ভৌগোলিক অঞ্চলৰ সৈতে জড়িত গুণাগুণ, মানদণ্ড বা সুনাম থকা সামগ্ৰীকহে জিআই টেগ প্ৰদান কৰা হয়। এই স্বীকৃতিয়ে থলুৱা জ্ঞানক সুৰক্ষিত কৰে, সামগ্ৰীৰ নামৰ অননুমোদিত ব্যৱহাৰ (নকল কৰা) ৰোধ কৰে আৰু স্থানীয় উৎপাদকসকলক উন্নত বজাৰ লাভ কৰাত সহায় কৰে।

এই ঐতিহাসিক স্বীকৃতিৰ ফলত অসমৰ হাজাৰ হাজাৰ শিল্পী, শিপিনী আৰু বাঁহ-বেতৰ শিল্পৰ সৈতে জড়িত গ্ৰাম্য লোক পোনপটীয়াভাৱে উপকৃত হ’ব।