গৃষ্মকালীন কাপোৰ

বাসৱী কাশ্যপ

সময়ৰ গতিৰ লগত খোজ মিলাই আমাৰ সাজপাৰ বা ফেশ্বনৰ ধাৰাও সলনি হয়। অসমৰ দৰে এখন ৰাজ্যত, য’ত ঋতু পৰিৱৰ্তন অতি স্পষ্ট, তাত ফেশ্বনৰ গুৰুত্ব আৰু অধিক বাঢ়ি যায় ।

গ্ৰীষ্মকালত ফেশ্বনৰ মূল মন্ত্ৰ হ’ল আৰাম ৷ এই সময়ত আমি এনেকুৱা কাপোৰ পিন্ধিবলৈ ভাল পাওঁ, যিয়ে গৰমৰ পৰা সকাহ দিয়ে।

কাপোৰঃ কপাহী, লিনেন বা খাদী কাপোৰৰ চাহিদা বাঢ়ে।

ৰংঃ বগা, পাতল নীলা, গুলপীয়া বা অন্যান্য পেষ্টেল ৰঙৰ কাপোৰে চকু আৰু মনক শীতলতা প্ৰদান কৰে।

ডিজাইনঃ ঢিলা-ঢালা কুর্তা, টি-ছাৰ্ট, আৰু প্লাজো আদি এই সময়ত খুবেই জনপ্রিয়। গ্রীষ্মকালত বগা ৰঙৰ কাপোৰ পিন্ধাটো কেৱল এটা ফেশ্বন নহয়, ইয়াৰ আঁৰত এক গভীৰ বৈজ্ঞানিক আৰু ব্যৱহাৰিক কাৰণো আছে। গৰমৰ দিনত বগা ৰঙক সকলোৰে প্ৰথম পছন্দ বুলি গণ্য কৰা হয়। বিজ্ঞানৰ মতে, বগা ৰঙে সূৰ্যৰ পোহৰ আৰু তাপ ধৰি নাৰাখি প্ৰতিফলিত কৰি দিয়ে । ফলত শৰীৰটো অধিক গৰম নহয় আৰু শীতল অনুভৱ হয়। আনহাতে, ক’লা বা ডাঠ ৰঙৰ কাপোৰে তাপ শোষণ কৰি লয়, যাৰ বাবে গৰম বেছি লাগে। বগা কাপোৰ সাধাৰণতে কপাহী বা লিনেন কাপোৰত বেছিকৈ পোৱা যায়। এই ধৰণৰ কাপোৰৰ মাজেৰে বায়ু চলাচল কৰিব পাৰে, ফলত শৰীৰৰ ঘাম সোনকালে শুকায় আৰু ছালখন জীপাল হৈ থাকে। প্ৰখৰ ৰ’দত ডাঠ ৰংবোৰ দেখিবলৈ কেতিয়াবা বিৰক্তিকৰ লাগে। কিন্তু বগা ৰঙে আমাৰ চকুৰ লগতে মনকো এক ধৰণৰ শান্তি আৰু শীতলতা প্ৰদান কৰে। ই এক পৰিষ্কাৰ আৰু সজীৱ লুক দিয়ে ।

বগা কুর্তা বা ছার্টঃ নীলা ডেনিম বা ক’লা পেণ্টৰ লগত খুব ধুনীয়া দেখায়।

বগা মেখেলা-চাদৰ : গ্ৰীষ্মকালৰ বিয়া-সবাহ বা অনুষ্ঠানত বগা ৰঙৰ অসমীয়া সাজপাৰ পিন্ধিলে এক ৰাজকীয় আৰু মাৰ্জিত ৰূপ ফুটি উঠে। বগা কাপোৰত ধূলি-বালি সোনকালে লাগে, সেয়েহে ইয়াক প্ৰতিবাৰ পিন্ধাৰ পাছত ধোৱাটো জৰুৰী। বগা কাপোৰৰ কাষলতি অংশত বহু সময়ত হালধীয়া দাগ পৰে। ইয়াৰ পৰা বাচিবলৈ কাপোৰ ধোওঁতে অলপ নেমুৰ ৰস বা ভিনেগাৰ ব্যৱহাৰ কৰিব পাৰে। বগা কাপোৰ ৰ’দত শুকুৱালে ইয়াৰ উজ্জ্বলতা বাঢ়ে। বগা কাপোৰৰ উজ্জ্বলতা ধৰি ৰখাটো সঁচাকৈয়ে এটা প্ৰত্যাহ্বান, কাৰণ অলপ অসাৱধান হ’লেই ই হালধীয়া বা ধূসৰ পৰি যায়। আপোনাৰ প্ৰিয় বগা কাপোৰযোৰ বহু দিনলৈ নতুনৰ দৰে উজ্জ্বল কৰি ৰাখিবলৈ তলত কেইটামান টিপছ দিয়া হ’ল—

পৃথককৈ ধোওকঃ বগা কাপোৰ কেতিয়াও ৰঙীন কাপোৰৰ সৈতে তিয়াই নথ’ব। ৰঙীন কাপোৰৰ পৰা ওলোৱা সামান্য ৰঙেও বগা কাপোৰৰ উজ্জ্বলতা নষ্ট কৰিব পাৰে।

ওলোটাকৈ ধোওকঃ কাপোৰ ধোৱাৰ সময়ত সদায় ওলোটাই ল’ব, যাতে কাপোৰৰ সূতা বা টেক্সচাৰ নষ্ট নহয় । কেতিয়াবা কেৱল ডিটার্জেণ্টেৰে কাপোৰৰ হালধীয়া ভাব আঁতৰ নহয় । তাৰ বাবে এইবোৰ টিপছ ব্যৱহাৰ কৰিব পাৰে—

নেমুৰ ৰসঃ এবাল্টি পানীত আধা কাপ নেমুৰ ৰস মিলাই বগা কাপোৰবোৰ এঘণ্টামান তিয়াই থৈ ধুলে কাপোৰ অতি উজ্জ্বল হয়।

বেকিং ছ’ডাঃ ধোৱাৰ সময়ত ডিটার্জেণ্টৰ লগত আধা কাপ বেকিং ছ’ডা মিলাই দিলে কাপোৰৰ পৰা দুৰ্গন্ধ আঁতৰ হয় আৰু বগা ৰংটো খিলখিলাই উঠে।

বগা ভিনেগাৰঃ কাপোৰ ধোৱাৰ শেষৰ পৰ্যায়ত অলপ ভিনেগাৰ মিলাই ধুলে কাপোৰ কোমল হয় আৰু যিকোনো দাগ সহজে আঁতৰে।