গীতাশ্ৰী গগৈ হাতীবৰুৱা
যিহেতুকে এতিয়া কমলাৰ বতৰ। এই বতৰৰ ফল কমলা আমি খোৱাৰ উপৰিও আমাৰ সৌন্দৰ্য্য চৰ্চাটো ব্যৱহাৰ হৈ আহিছে। এই ফলৰ বাকলি গোটেই বছৰটোৰ কাৰণে সংৰক্ষণ কৰি থব পাৰি আৰু প্ৰয়োজনত তাক ব্যৱহাৰ কৰিলেই হ’ল।
প্ৰথমে কমলাৰ বাকলি খিনি ৰ’দত ভালকে শুকুৱাই ল’ব। তাৰ পিছত গুৰি কৰি এটা টেমাত ভৰাই থব।
কমলাৰ বাকলিৰ গুৰিত প্ৰচুৰ পৰিমাণে ভিটামিন চি পোৱা যায়। যিয়ে আমাৰ ছাল খনত কলাজেন উৎপাদনত সহায় কৰে। ইয়াৰোপৰি এন্টিঅক্সিডেন্ট গুণো পোৱা যায়। সেয়েহে ইয়াৰ ব্যৱহাৰৰ ফলত ছালত মৃত কোষবোৰ আঁতৰ হয় যাৰ ফলত ছালখন উজ্জ্বল আৰু মসৃণ হয়।
কমলাৰ বাকলিৰ গুৰি ছাল খনত কেনেকৈ ব্যৱহাৰ কৰিব পাৰি জানো আহক।
এটা বাটিত দুই চামুচ কমলাৰ বাকলিৰ গুৰি লৈ তাৰ লগত এক চামুচ দৈ মিহলাই পেষ্ট তৈয়াৰ কৰি মুখ আৰু ডিঙিত লগাই দহ বা পোন্ধৰ মিনিটৰ কাৰণে ৰাখিব। পোন্ধৰ মিনিটৰ পিছত কুহুমীয়া পানীৰে ধুই পেলাব। এনেকৈ সপ্তাহত দুবাৰ মান কৰিলে ছাল খনৰ আগৰ সতেজতা ঘোৰাই পাব।
এক চামুচ কমলাৰ বাকলিৰ গুৰিৰ লগত এক চামুচ গোলাপ জল আৰু আধা চামুচ দৈ মিহলাই এটা পেষ্ট বনাই মুখত লগাই দহ মিনিটৰ পিছত পৰিষ্কাৰ পানীৰে ধুই পেলাব। এনেকৈ সপ্তাহত তিনিবাৰ মান কৰিলে মুখৰ উজ্জ্বলতা বাঢ়িব।
এক চামুচ কমলাৰ বাকলিৰ গুৰি,এক চামুচ মৌ আৰু কেই টুপাল মান নেমুৰ ৰস মিহলাও ফেচ পেক হিচাপে মুখ আৰু ডিঙিত লগাব পাৰে। যদি আপোনি নেমু লগাব নোৱাৰে তেন্তে নেমুৰ সলনি গোলাপ জল দি ল’ব।
কমলাৰ বাকলিৰ গুৰিৰ লগত দৈ আৰু সামান্য পৰিমাণে হালধি মিহলাই এটা পেষ্ট তৈয়াৰ কৰি ল’ব । কিছুমান লোকৰ ডিঙি ,কিলাকুটি , কাষলটি ছাল খনতকে অলপ কলা বা ডাৰ্ক বৰণৰ হয় তেওঁ লোকে এই পেকটো সেই নিৰ্দিষ্ট ঠাই খিনিত লগাব পাৰে। পেকটো লগোৱাৰ পিছত চাৰি পাঁচ মিনিট মান সময় মাছাজ কৰি দহ মিনিট মান সময় ৰাখি ধুই পেলাব।
কমলাৰ বাকলিৰ গুড়ি আৰু চেনি ১ চামুচ দিব। অতি ডাঠ পেষ্ট বনাবলৈ নেমুৰ ৰস আৰু গোলাপৰ পানী কেইটোপালমান দিব। স্ক্ৰাবটো লগাই ৫-৭ মিনিট লাহে লাহে মালিচ কৰিব। স্বাভাৱিক/ঠাণ্ডা পানীৰে মুখখন ধুই শুকুৱাই লওক।
এইবাৰ কমলাৰ বাকলি পেলাই নিদি বছৰটোৰ কাৰণে সংৰক্ষণ কৰি এনেকৈ নিজৰ সৌন্দৰ্য্য চৰ্চাত ব্যৱহাৰ কৰি চাওক চোন ।
Comments are closed, but trackbacks and pingbacks are open.