ড° বুলজিৎ বুঢ়াগোহাঁই
২৩ ডিচেম্বৰ, ২০২৪ তাৰিখে অনুষ্ঠিত হোৱা অসম ৰাজ্যিক কেবিনেটৰ এটা গুৰুত্বপূৰ্ণ সিদ্ধান্ত হ’ল জনসাধাৰণৰ মাজত বিশেষকৈ যুৱ সমাজৰ মাজত গ্রন্থ পঢ়াৰ অভ্যাস বৃদ্ধি কৰিবলৈ ২০২৫ বৰ্ষটি ‘কিতাপৰ বৰ্ষ’ হিচাপে পালন। প্ৰথমবাৰৰ বাবে ২৭ ডিচেম্বৰৰ, ২০২৪ পৰা ৭ জানুৱাৰী, ২০২৫ লৈ গুৱাহাটীৰ খানাপাৰা পশু চিকিৎসা মহাবিদ্যালয় খেলপথাৰত ‘অসম গ্রন্থমেলা’ অনুষ্ঠিত হয়। ২০২৫ বছৰটোৰ ভিতৰত সকলো জিলাতে গ্রন্থমেলা অনুষ্ঠিত হ’ব আৰু গ্ৰন্থ অধ্যয়নৰ সংস্কৃতিক প্ৰচাৰ কৰা হ’ব। নতুন বছৰৰ উপহাৰ হিচাপে কিতাপ প্রদানৰ ব্যৱস্থা কৰা হ’ব। বিভাগসমূহে চৰকাৰী-কর্মচাৰীসকলৰ মাজত অধ্যয়ন সংস্কৃতিক প্রসাৰিত কৰিবলৈ পৃথিভঁৰাল নির্মাণ বা সৃষ্টি কৰিব। গ্ৰন্থ অধ্যয়ন আৰু ক্ৰয়ৰ অভ্যাস বৃদ্ধি কৰিবৰ বাবে চৰকাৰে লোৱা সিদ্ধান্তৰ বাবে কিতাপ বিতৰক এক লাভজনক কেৰিয়াৰ হ’ব পাৰে ।
বিশেষকৈ সাহিত্য, পঢ়া আৰু প্ৰকাশন উদ্যোগৰ প্ৰতি আগ্ৰহী লোকসকলৰ বাবে কিতাপ বিতৰক এক উপযুক্ত কেৰিয়াৰ হ’ব পাৰে। এজন কিতাপ বিতৰকে প্ৰকাশক আৰু খুচুৰা বিক্ৰেতা (কিতাপৰ দোকান, ই-কমাৰ্চ প্লেটফৰ্ম, পুথিভঁৰাল, বিদ্যালয়, মহাবিদ্যালয় আদি)ৰ মাজত সাঁকো, হিচাপে কাম কৰে। তেওঁলোকৰ প্ৰধান দায়িত্ব হৈছে প্ৰকাশকসকলৰ পৰা কিতাপ সংগ্ৰহ কৰা আৰু গ্ৰাহকৰ বাবে বজাৰত উপলব্ধ হোৱাটো নিশ্চিত কৰা। সাক্ষৰতাৰ হাৰ বৃদ্ধি পোৱাৰ লগে লগে কিতাপৰ চাহিদা বৃদ্ধি পাইছে। পাঠ্যপুথি, শিশুৰ কিতাপ আৰু প্ৰতিযোগিতামূলক পৰীক্ষাৰ গাইডৰ ব্যৱসায় উন্নত হৈছে, যাৰ ফলত বিতৰণ সেৱা অহৰহ প্ৰয়োজন হৈছে। আমাজন, ফ্লিপকাৰ্ট আৰু অন্যান্য প্লেটফৰ্মৰ সৈতে ই-কমাৰ্চ বিতৰণত সুযোগ আছে।
এজন সফল কিতাপ বিতৰক হ’বলৈ ব্যৱসায়িক দক্ষতা, পাৰস্পৰিক দক্ষতা, আৰু কিতাপৰ বজাৰৰ বিষয়ে বুজাৰ প্ৰয়োজন। কিতাপ বিতৰক হ’বৰ বাবে কোনো এক নির্দিষ্ট শিক্ষাগত অৰ্হতা প্ৰয়োজনীয়তা নাই, কিন্তু কিছুমান অৰ্হতা আৰু দক্ষতা এই ক্ষেত্ৰত সফলতাৰ বাবে সহায় হ’ব পাৰে। ন্যূনতম শিক্ষাগত অৰ্হতা যিকোনো শাখাত দ্বাদশ শ্রেণীত উত্তীৰ্ণ হ’ব লাগে। কিন্তু বাণিজ্য শাখাত দ্বাদশ শ্রেণীত উত্তীৰ্ণ হ’লে বিতৰণ, লজিষ্টিক আৰু বিত্তীয় ব্যৱস্থাপনা বুজাৰ বাবে সহায়ক হ’ব পাৰে। যদিও বাধ্যতামূলক নহয়, কিন্তু ব্যৱসায় প্ৰশাসন (বিবিএ), বাণিজ্য (বি.কম), বা বা মেনেজমেণ্ট (বিএমএছ) দৰে ক্ষেত্ৰত স্নাতক ডিগ্রীধাৰী হ’লে ব্যৱসায় পৰিচালনা, বিপণন, অপাৰেচন মেনেজমেণ্ট আদি বিষয়বোৰ বুজাত সহায় কৰিব পাৰে। এই দক্ষতাসমূহ বিতৰণ প্ৰক্ৰিয়াটো সুচাৰুভাৱে পৰিচালনা কৰিবলৈ অতি মূল্যবান। চাপ্লাই চেইন আৰু ল’জিষ্টিক মেনেজমেণ্ট বিষয়ত ডিপ্ল’মা বা চাৰ্টিফিকেট পাঠ্যক্রম গ্রহণ কৰিলে যোগান শৃংখল ব্যৱস্থাপনা, তথ্য নিয়ন্ত্ৰণ, আৰু বিতৰণ লজিষ্টিকছৰ জ্ঞান লাভত বিশেষভাৱে সহায়ক হ’ব পাৰে। বিপণন আৰু বিক্ৰী প্ৰশিক্ষণ গ্রহণ কৰিলে বিপণন, খুচুৰা বিতৰণ, আৰু বিক্ৰীৰ নীতিসমূহ বুজি পোৱা যায় যিবোৰ প্ৰকাশক, খুচুৰা বিক্ৰেতা, আৰু ই-কমাৰ্চ প্লেটফৰ্মৰ সৈতে আলোচনা কৰিবলৈ সহায়ক হ’ব পাৰে। আনুষ্ঠানিক শিক্ষাৰ গুৰুত্ব আছে যদিও খুচুৰা বিক্ৰী বা বিতৰণৰ ক্ষেত্ৰত প্ৰায়োগিক অভিজ্ঞতা অতি গুৰুত্বপূর্ণ। বহুতো সফল বিতৰকে নিজৰ ব্যৱসায় আৰম্ভ কৰাৰ আগতে কিতাপৰ দোকানত বা বিদ্যমান বিতৰণ নেটৱৰ্কসমূহৰ সৈতে কাম কৰি এই ক্ষেত্ৰখনৰ জ্ঞান অৰ্জন কৰে। গ্ৰন্থ উদ্যোগ, ইয়াৰ ধাৰা আৰু ইয়াৰ লগত জড়িতৰ ব্যক্তিসকলৰ সৈতে পৰিচিত হোৱাটো আনুষ্ঠানিক শিক্ষাৰ দৰেই গুৰুত্বপূৰ্ণ হ’ব পাৰে। গ্ৰন্থমেলাত অংশগ্ৰহণ কৰা, প্ৰকাশকৰ সৈতে মত বিনিময় কৰা, বিভিন্ন ধৰণৰ কিতাপৰ বজাৰৰ চাহিদা বুজি পোৱাটোৱে বিতৰকক নিজৰ ব্যৱসায় আগবঢ়াত সহায় কৰিব।
কিতাপ বিতৰণ কৰা ধৰণ, আগবঢ়োৱা বজাৰ, আৰু বিতৰণ কৰা চেনেলৰ ওপৰত ভিত্তি কৰি কিতাপ বিতৰকক শ্ৰেণীভুক্ত কৰিব পাৰি, যেনে- বাণিজ্য কিতাপ বিতৰক, শিক্ষামূলক কিতাপ বিতৰক, আঞ্চলিক ভাষা কিতাপ বিতৰক, ডিজিটেল কিতাপ বিতৰক, ভিত্তিমূল কিতাপ বিতৰক, পুথিভঁৰালৰ কিতাপ বিতৰক, কৰ্পোৰেট কিতাপ বিতৰক, পাইকাৰী কিতাপ বিতৰক, স্বতন্ত্ৰ কিতাপ বিতৰক আদি।
কিতাপ বিতৰক হিচাপে আৰম্ভ কৰিবলগীয়া পদক্ষেপসমূহ হ’ল- বজাৰৰ গৱেষণা কৰা, ব্যৱসায় পঞ্জীয়ন কৰা, প্ৰকাশকৰ সৈতে সম্পৰ্ক গঢ়া, লজিষ্টিক ব্যৱস্থা গঢ়া, অনলাইন মাধ্যম অন্বেষণ কৰা, প্ৰচাৰ কৰা আদি।
কিতাপ বিতৰণ উদ্যোগে বিশেষকৈ কৌশলগত পৰিকল্পনা আৰু দীৰ্ঘম্যাদী দৃষ্টিভংগীৰ সৈতে কেৰিয়াৰ বৃদ্ধিৰ উল্লেখযোগ্য সম্ভাৱনা প্ৰদান কৰে। সম্প্ৰসাৰণ, প্ৰযুক্তি একত্ৰীকৰণ, নিৰ্দিষ্ট বজাৰ, আৰু অংশীদাৰিত্বৰ ওপৰত গুৰুত্ব আৰোপ কৰি বিতৰকসকলে এটা শক্তিশালী কেৰিয়াৰ পথ গঢ়ি তুলিব পাৰে। যিসকলে বজাৰৰ পৰিৱৰ্তনৰ সৈতে অহৰহ খাপ খাই পৰে, নতুন সুযোগত বিনিয়োগ কৰে, আৰু উদ্যোগটোৰ ভিতৰত দৃঢ় সম্পৰ্ক গঢ়ি তোলে, তেওঁলোকৰ ভৱিষ্যত উজ্জ্বল দেখা যায়।
ফোন : ৯৪৩৫১৮৮৬৩০
Comments are closed, but trackbacks and pingbacks are open.