আইমণি গোহাঁই দিহিঙীয়া
চজিনা পাতৰ উপকাৰিতা……
বাৰিষা লহপহকৈ বাঢ়ি অহা চজিনা পাতবোৰ আমাৰ শৰীৰৰ বাবে অত্যন্ত উপকাৰি বুলি সকলোৰে জ্ঞাত। বিশেষকৈ চজিনা পাতক শৰীৰৰ বাবে লাগতিয়াল ভিটামিন, খনিজ পদাৰ্থ, এন্টিঅক্সিডেন্টৰ উৎস বুলি বিভিন্ন তথ্যৰ পৰা জানিব পাাৰিছোঁ। সেয়েহে বাৰিষাৰ সময়ছোৱাত কোমল চজিনা পাতবোৰ আমাৰ নিয়মিত খাদ্যৰ তালিকাত সংযোজন কৰি শৰীৰ সুস্থ কৰি ৰখাত অৰিহনা যোগাব পাৰোঁ।
চজিনাপাতৰ বিবিধ ব্যঞ্জন
চজিনা পাতেৰে হাৰিয়ালি চিকেন
উপকৰণ…
১/ লোকেল মূৰ্গী ৮০০ গ্ৰাম
২/ কোমলীয়া চজিনা পাতৰ পেষ্ট ৫ টেবুল চামুচ
৩/ পিয়াজ ৪ টা,তেজপাত দুখন
৪/ নহৰু -আদাৰ পেষ্ট ২চাহচামুচ
৫/ জিৰাগুৰি ১ চাহ চামুচ
৬/ নিমখ -হালধি জোখমতে
৭/জালুকৰ গুৰি ১ চাহ চামুচ
৮/ ইলাচি-দালচেনিৰ গুৰি ১ চাহচামুচ
৯/ মিঠাতল জোখমতে
১০/ আলু এটা বা দুটাও দিব পাৰে।
#প্ৰস্তুতপ্ৰণালী…
প্ৰথমে মূৰ্গীটো সমানজোখত কাটি লব। তাৰ পাচত সামান্য আদাৰ পেষ্ট আৰু অলপ নেমুৰ
ৰস সানি মাংসখিনি আধা ঘন্টা মেৰিনেট কৰি থব। তাৰ পাচত চজিনাপাতখিনি ডালৰ পৰা এৰুৱাই ভালকৈ ধুই ৪/৫ কোঁহ নহৰু আৰু দুটা কেঁচা জলকীয়াৰ সৈতে কেৰাহিত নামমাত্ৰ ভাজি মিস্কিত পাতখিনি পেষ্ট কৰি লব। এতিয়া কেৰাহিত তেল দি মিহিকৈ কুটিলোৱা পিয়াজ,আদা-নহৰুৰ পেষ্ট, তেজপাত, কেঁচাজলকীয়া, লগতে ডাঙৰকৈ কাটিলোৱা আলু কেইডোখৰো দি অলপ ভাজি লব। নাম মাত্ৰ চেনিও দিব। মচলাখিনি ৰঙচুৱা হলে তাত মেৰিনেট কৰি থোৱা মাংসখিনি দি ভাজি থাকিব। লগতে জোখমতে নিমখ -হালধি দিব। সামান্য পানী ছটিয়াই এনেকৈ ভাজি থাকি জোখত পানীদি ঢাকোন মাৰি উতলিবলৈ দিব। তাৰ পাচত মাংস আৰু আলু সিজিলে তাত পেষ্ট কৰি থোৱা চজিনাৰ পাত জালুকৰ গুৰি আৰু দালচেনি -ইলাচিৰ গুৰি খিনি দি ঢাকোন নিদিয়াকৈ ৫/৬ মিনিট উতলাই জোখত পানী থৈ নমাই,গৰমে গৰমে ভাত বা ৰুটিৰ লগত পৰিবেশন কৰিব। যিকোনো সেউজীয়া পাচলিৰ পেষ্ট দি তৰকাৰি ৰান্ধোতে ঢাকোন দিলে ইয়াৰ স্বাভাৱিক সেউজীয়া ৰঙটো নোহোৱা হয়।
এনেকৈ চজিনা পাতেৰে ৰন্ধা মাংসৰ জোলখন অত্যন্ত সুগন্ধেৰে ভৰা আৰু সোৱাদযুক্ত।
নাখালে ইয়াৰ সোৱাদ অনুমান কৰিব নোৱাৰি।
চজিনাপাত , কঁঠালগুটি, চাউলৰ গুৰিৰে সুস্বাদু খাৰৰ আঞ্জা…
উপকৰণ…
১/ চজিনা পাত হাতেৰে তিনিমুঠি
২/ নহৰু -আদাৰ পেষ্ট আধা চাহ চামুচ
৩/পিয়াজ এটা
৪/ চাউলৰ গুৰিৰ পেষ্ট ৩ টেবুল চামুচ
৫/কেঁচাজলকীয়া ৩টা
৬/ কল খাৰ জোখমতে
৭/ কঁঠাল গুটি ৬/৭ টামান
৮/ নিমখ জোখমতে
৯/ কেঁচামিঠাতেল ১ টেবুল চামুচ
প্ৰস্তুতপ্ৰণালী…
প্ৰথমে চজিনা পাত ভালকৈ ধুই-পখালি লব। পিয়াজ মিহিকৈ কুটি লব। চাউল তিয়াইলৈ পেষ্ট
বনাই লব। এতিয়া কেৰাহিত অলপ তেল দি পিয়াজ,আদা-নহৰুৰ পেষ্ট,কেঁচাজলকীয়া ফুৰণত দি ৰঙচুৱাকৈ ভাজি লব। তাৰ পাচত ধুইথোৱা চজিনা পাতখিনিও তাতে দি অলপ ভাজি লব। নিমখ জোখত দিব। চজিনা পাত খিনি তেলত মজি গলে তাত কঁঠাল গুটি কেইটা দি অলপ ভাজি কলখাৰখিনি দিব। লগতে অলপ পানী দি খাৰখিনি উতলিবলৈ দিব পানীশুকাই কঁঠাল গুটি সিজিলে ওপৰত চাউলৰ পেষ্ট খিনি দি পুনৰ অলপ পানীদি উতলাই নমোৱাৰ আগে আগে কেঁচা মিঠাতেল ১ টেবুল চামুচ দি নমাই ভাতৰ লগত পৰিবেশন কৰিব।
চজিনাপাতেৰে স্বাস্থ্যসন্মত আৰু সোৱাদভৰা পিতিকা……
উপকৰণ…
১/চজিনা পাত হাতেৰে দুমুঠি
২/ আলু এটা
৩/ ডাঙৰ আকাৰৰ পিয়াজ এটা
৪/ কেঁচা জলকীয়া ৩/৪ টা মান
৫/ কেঁচা মিঠাতেল জোখমতে
৬/ নহৰু ৫/৬ কোঁহ
৭/ গোল নেমু আধা ফাল
প্ৰস্তুত প্ৰণালী…
প্ৰথমে চজিনা পাতখিনি ঠাৰিৰ পৰা এৰুৱাই ভালকৈ ধুই লব। তাৰ পাচত নামমাত্ৰ তেল দি নহৰু , কেঁচাজলকীয়া আৰু চজিনাপাত খিনি অলপ গৰম কৰি মিস্কিত পেষ্ট বনাই লব। আলুটো বইল কৰি লব। কেঁচাজলকীয়া আৰু পিয়াজ মিহিকৈ কুটি লব।এতিয়া পেষ্ট কৰি লোৱা চজিনাপাত, বইল কৰি লোৱা আলু, কুটিলোৱা জলকীয়া আৰু পিয়াজ ,কেঁচা মিঠাতেল নেমুৰ ৰস সকলোখিনি উপকৰণ একেলগে ভালকৈ গৰম ভাতৰ লগত পৰিবেশন কৰিব।
চজিনা পাত আৰু মগুদালিৰে ৰৌমাছৰ টেঙাজোল…
উপকৰণ…
১/ চজিনাপাত তিনি মুঠি
২/ মগুদালি জোখমতে
৩/ ৰৌমাছ ৫ /৬ টুকুৰা
৪/ গোল নেমু এটা
৫/ পিয়াজ এটা
৬/ শুকান জলকীয়া দুটা কেঁচা জলকীয়া দুটা
৭/ নিমখ-হালধি জোখমতে
৮/তেজপাত এখিলা
প্ৰস্তুতপ্ৰণালী…
প্ৰথমে চজিনাপাতখিনি ভালকৈ ধুই মিহিকৈ কুটি লব। মগুদালিও ভালকৈ ধুই অলপ সময় তিয়াইথৈ দিব। তাৰ পাচত মগুদাইল আৰু চজিনা পাত খিনি জোখত নিমখ দি কেৰাহিত আধা সিজাই লব। ৰৌ মাছ কেইডোখৰো অলপ ভাজি লব। মাছ ভজা হলে সেই তেলতে মিহিকৈ কুটি লোৱা পিয়াজ,শুকান জলকীয়া আৰু তেজপাত ফুৰণত দি ধুনীয়া গোন্ধ ওলালে তাতে জোখত হালধি দি সিজোৱা দালি আৰু মাছ কেইডোখৰ দি কম জুইত উতলাই থাকিব। এনেকৈ উতলাই দালি খিনি জোখত ৰাখি গোলনেমুৰ ৰস আৰু কেঁচাজলকীয়া কেইটা গোটাকৈ দি নমাই গৰমে গৰমে ভাতৰ লগত পৰিবেশন কৰিব। মগুদালিত চজিনাপাত গোলনেমু দিয়া মাছৰ জোলখন সঁচাই লোভনীয়।
ফোনঃ ৭০৮৬৮৮৬৬৪৮
Comments are closed, but trackbacks and pingbacks are open.