ক্লিনিকেল ডিপ্রেছন

নিমি বৰগোহাঁই

আজি কিছুদিন পূর্বে মোৰ ওচৰলৈ এগৰাকী মহিলা আহিছিল৷ অলপতে তেওঁ চাকৰিৰ পৰা অৱসৰ গ্রহণ কৰিছে৷ মোক আহি কলে যে আজিকালি মোৰ একো কৰিব মন নাযায়, অকল এলাহ এলাহ ভাৱ আহি থাকে৷ টোপনি টোপনি লাগি থাকে৷ একোৱে ভাল নালাগে, কতো যাব মন নাযায়, কোনো পৰিৱেশ ভাল নালাগে৷ গোটেহ কথাখিনি মই নিৰীক্ষণ কৰাৰ পাছত লগতে তেওঁৰ গোটেই পৰীক্ষা–নিৰীক্ষা কৰাৰ পিছত গম পালোঁ যে তেওঁৰ একো শাৰীৰিক বেমাৰ নাই৷ তেওঁৰ গোটেই লক্ষণবোৰ ক্লিনিকেল ডিপ্রেছনৰ লক্ষণ৷ আজিৰ যুগত এক চিৰপৰিচিত বেমাৰ ক্লিনিকেল ডিপ্রেছন৷ কি এই ক্লিনিকেল ডিপ্রেছন?

হতাশাৰ পৰিসৰ মৃদুৰ পৰা অস্থায়ী দুখ লগাৰ পৰা নিৰন্তৰ হতাশালৈ হয়৷ ক্লিনিকেল ডিপ্রেছন অর্থাৎ নিদানিক হতাশা হৈছে হতাশাৰ অধিক গুৰুতৰ প্রসাৰ, যাক আমি মেজৰ ডিপ্রেছন বা মেজৰ ডিপ্রেছিভ ডিছর্ডাৰ বুলি কওঁ৷ ইয়াৰ লক্ষণসমূহ সাধাৰণতে হোৱা হতাশা যেনে– কাৰোবাৰ লোকচান, প্রিয়জনৰ মৃত্যু ইত্যাদি কাৰণত হোৱা হতাশাৰ নিচিনা নহয়৷ ইয়াৰ লক্ষণসমূহ হৈছে দুখলগা, অশ্রুসিক্ততা, পুণ্যতা বা নিৰাশা অনুভূতি৷ মৰমৰ কথাতো খং উঠা বা হতাশ হোৱা৷ দৈনন্দিন কামৰ প্রতি অনীহা, এলাহ, আগ্রহ বা আনন্দ হেৰুৱাই পেলোৱা৷ অতিমাত্রা টোপনি বা একেবাৰে টোপনি নহা, ভাগৰ লগা কোনো কাৰণ নোহোৱাকৈ আৰু যিকোনো কাম কৰিবলৈ নিজকে ঠেলা মৰা৷ ভোক লগাটো কমি অহা অথবা অলপ খালেই ভোক বন্ধ হোৱাটো হতাশাগ্রস্ততাত ভোগা ব্যক্তিৰ ক্ষেত্রত দেখিবলৈ পোৱা যায়৷ কিছু ক্ষেত্রত বহুত বেছিকৈও পোৱা যায়৷ মনত উদ্বেগ, অস্থিৰতা, মন্থৰ চিন্তা, কথা কোৱা বা শৰীৰৰ চলাচল মন্থৰ হোৱাৰ লক্ষণসমূহ শাৰীৰিকভাৱে হয়৷ যিহেতু শৰীৰ আৰু মন ওতপ্রোতভাৱে জড়িত বহু ব্যক্তিয়ে হতাশাত ভুগি থাকিলেও তেওঁলোকে শাৰীৰিক অসুবিধা বুলি ভাবি মানসিক ৰোগৰ বিভাগত চিকিৎসকতকৈ শাৰীৰিক ৰোগ বিভাগৰ চিকিৎসকৰ পৰা পৰামর্শ লয়৷ এই ৰোগত এজন ব্যক্তিয়ে নিজকে মূল্যহীনতা বা অপৰাধৰ অনুভূতি, অতীতৰ বিফলতা বা আত্ম–দোষৰ ওপৰত নির্ভৰ কৰা, সঘনাই মৃত্যুৰ চিন্তা, আত্মহত্যাৰ চিন্তা অথবা আত্মহত্যাৰ চেষ্টা, আত্মহত্যাৰ কথা বাৰে বাৰে মনলৈ আহি থকা কাৰকসমূহ হতাশাত ভোগা এজন ব্যক্তিৰ ক্ষেত্রত দেখিবলৈ পোৱা যায়৷ হতাশাত ভোগ এজন ব্যক্তিয়ে হয়তো মন বেয়া লগা বুলি কোৱাতকৈ শাৰীৰিক সমস্যাসমূহ যেনে মূৰৰ বিষ, কঁকালৰ বিষ, পিঠিৰ বিষ, ডিঙিৰ বিষ, সঘনাই পেট বেয়া হোৱা ইত্যাদি কাৰকসমূহ ব্যক্ত কৰে৷

লক্ষণবোৰ সাধাৰণতে আনৰ সতে সম্পর্ক, দৈনন্দিন কার্যকলাপ, পঢ়া–শুনা, সামাজিক কার্যকলাপত লক্ষণীয় সমস্যা সৃষ্টি কৰাৰ বাবে যথেষ্ট গুৰুতৰ হয়৷

ক্লিনিকেল ডিপ্রেছনে যিকোনো বয়সৰ লোকক প্রভাৱিত কৰিব পাৰে শিশুসহ৷ এই সমস্যাবোৰ গুৰুতৰ হলেও সময়মতে মানসিক চিকিৎসকৰ পৰামর্শ অনুযায়ী ঔষধ আৰু মানসিক পৰামর্শৰ দ্বাৰা উপকৃত হব পাৰে৷

ফোনঃ ৯৮৬৪০-৯৬৫১৩