আজিকালি সমগ্ৰ বিশ্বতে অত্যধিক কৰ্মব্যস্ততাৰ লগত মানুহৰ খাদ্যাভ্যাসৰ সলনি হৈছে। আধুনিক প্ৰতিযোগিতামূলক পৃথিৱীখনৰ লগত ফেৰ মাৰিবলৈ গৈ মানুহৰ খোৱা-বোৱাৰ প্ৰতি গুৰুত্ব কমি গৈছে। খোৱা-বোৱাৰ কোনো নিয়মানুৱৰ্তিতা নোহোৱা হৈছে। সময়ৰ অভাৱত অতি কম সময়তে তৈয়াৰ কৰিব পৰা কিছুমান অস্বাস্থ্যকৰ খাদ্য মানুহে দৈনন্দিন খাদ্য তালিকাত অন্তৰ্ভুক্ত কৰে। বাহিৰৰ ৰেস্তোৰাঁ বা ফুটপাথত মুকলিকৈ ৰখা কিছুমান খাদ্য যেনে– ফাষ্ট ফুড, চানা আদি যিকোনো ঠাইতে সহজলভ্য বাবে বহুতে এনেধৰণৰ খাদ্য খায়েই ভোক নিবাৰণ কৰে। এনে খাদ্য খোৱাৰ ফলত পেটত গেষ্টি˜কৰ সমস্যা হোৱা, মুখেৰে টেঙা উগাৰ ভাব অহা আদি নানা সমস্যাই দেখা দিয়ে। আনহাতে স্বাস্থ্যৰ বাবে যথেষ্ট পৰিমাণে পানী সেৱন কৰিব লাগে। পানী কমকৈ খোৱাৰ বাবেও বিভিন্ন বেমাৰৰ সন্মুখীন হ’ব লগা হয়। পানী খাওঁতে সদায় বিশুদ্ধ ফিল্টাৰযুক্ত পানীহে খোৱাত গুৰুত্ব দিব লাগে। অপৰিষ্কাৰ পানী য’তে-ত’তে সেৱন কৰাৰ ফলত ডিপ’থেৰিয়া আদিৰ দৰে মাৰাত্মক ৰোগৰ লক্ষণো আমাৰ শৰীৰত দেখা দিয়ে। ইয়াৰ উপৰি বৰ্তমান সময়ত সকলো মানুহৰে এটা ডাঙৰ সমস্যা হৈছে টোপনি কম হোৱা। ৰাতি বহু দেৰিলৈ নোশোৱা বাবে টোপনি কমকৈ হয় আৰু টোপনি ক্ষতি হোৱাৰ ফলত খোৱা খাদ্য ভালদৰে হজম নহয়। ইয়াৰ ফলত পুৱা বমি বমি ভাব হোৱা, গেষ্ট্ৰিকৰ দৰে বিভিন্ন সমস্যা হয়। অধিক কৰ্মব্যস্ত¸তাৰ ফলত সময়মতে শৌচ-প্ৰস্ৰাৱ নকৰাৰ ফলত নানান সমস্যা যেনে–কোষ্ঠকাঠিন্য অথবা পাইলছ আদিৰ দৰে ৰোগত ভোগা দেখা যায়। সেয়েহে এনে সমস্যাসমূহৰ পৰা মুক্ত হ’বলৈ হ’লে আমি সকলোৱে মানি চলিবলগীয়া কিছুমান নীতি-নিয়ম বা অভ্যাস সদায় পালন কৰাটো বাঞ্ছনীয়। এনে কিছুমান খাদ্যাভ্যাসৰ নমুনা তলত দাঙি ধৰা হ’ল :–

কম সময়তে ঘৰতে তৈয়াৰ কৰিব পৰা খাদ্য যেনে– গজালি ওলোৱা মগু মাহ, বুট সিজোৱা, বাদাম, তিযঁþহ আদি চালাড হিচাপে অফিচ বা স্কুল-কলেজলৈ যাওঁতে টিফিন হিচাপে লৈ যাব পাৰে। অথবা কম সময়তে বনাব পৰা পেন কেক বা পানী পিঠা আদিও টিফিনত ব্যৱহাৰ কৰিব পাৰে।

বাহিৰত পোৱা বিভিন্ন ধৰণৰ ঠাণ্ডা পানীৰ পৰিৱৰ্তে ডাব নাৰিকলৰ পানী সেৱন কৰিলে গা শীতল পৰে আৰু বেমাৰৰ পৰাও সকাহ পোৱা যায়। আনহাতে বিভিন্ন ধৰণৰ পেকেটত সংৰক্ষণ কৰি ৰখা শুকান খাদ্য, ভুজিয়া, চিপছ খোৱাৰ পৰিৱৰ্তে কেঁচা ফলমূলৰ চালাড আদি খালে পেট জ্বলা-পোৰা আদি সমস্যাও নাইকিয়া হয়।
ভাল স্বাস্থ্যৰ বাবে খাদ্যত ব্যৱহাৰ কৰিবলগীয়া কেইটামান খাদ্যবস্তুৰ ব্যৱহাৰ তলত উল্লেখ কৰা হ’ল–

খাদ্য বনাওঁতে অলিভ অইল, ছানফ্লাৱাৰ, কৰ্ণ অইল আদি ব্যৱহাৰ কৰক। মাছত অমেগা-তিনি ফেটি এচিড যথেষ্ট পৰিমাণে থাকে। মাছ খাওঁতে ছালমন, টুনা মাছ আদি অন্তৰ্ভুক্ত কৰিব পাৰে। নাৰিকলৰ তেল উচ্চ মেদযুক্ত তেল, কিন্তু ইয়াত বহুত কলেষ্ট’ৰেল থাকে বাবে ইও আমাৰ খাদ্যৰ বাবে উপযোগী। সু-স্বাস্থ্যৰ বাবে গ্ৰহণ কৰিবলগীয়া খাদ্য–

ফলমূল আৰু চবজি যথেষ্ট পৰিমাণে খাব লাগে ভিটামিন আৰু আইৰনৰ বাবে। চেনি বা নিমখ মিহলাই বনোৱা মিঠা খাদ্য খোৱাৰ পৰিৱৰ্তে কেঁচা ফলমূল আৰু চবজি খাবলৈ যত্ন কৰক।
প্ৰটিনৰ বাবে বিন, টফু অথবা মাংস খাওক।
আটাৰে তৈয়াৰী ব্ৰেড, আটাৰে তৈয়াৰী পেষ্টা আদি ব্যৱহাৰ কৰক।
কম মেদযুক্ত গাখীৰেৰে তৈয়াৰী খাদ্য খাবলৈ স্কিম মিল্কৰ দৰে গাখীৰ ব্যৱহাৰ কৰক।
সু-স্বাস্থ্যৰ বাবে তলত দিয়া বদ অভ্যাসবোৰ পৰিহাৰ কৰক–
খাদ্য খোৱাৰ সময় খুব দীঘলীয়া ব্যৱধান ৰাখিব নালাগে। অথবা বহু সময় ধৰি ভোকত থাকিব নালাগে।
বেছিকৈ চাহ, কফী বা ঠাণ্ডা পানী খোৱাৰ পৰা বিৰত থাকক।
শুকানকৈ ভজা খাদ্য খোৱা কমকৈ কৰক।
খাদ্য খোৱাৰ পিছতেই বিছনালৈ যোৱাৰ অভ্যাস ত্যাগ কৰক।
স্বাস্থ্যই পৰম সম্পদ। গতিকে কামৰ ব্যস্ততাৰ মাজতো সামান্য নিজৰ স্বাস্থ্যৰ বাবে সময় উলিয়াই সঠিক সময়ত সঠিক খাদ্য খাবলৈ সকলোৱে যত্ন কৰক। যাৰ দ্বাৰা আমি বেমাৰমুক্ত হোৱাৰ লগতে সু-স্বাস্থ্যৰ অধিকাৰী হ’ব পাৰোঁ, যিটো আমাৰ জীৱনৰ আটাইতকৈ মূল্যৱান সম্পদ।

টিনাবেবী বৰুৱা

LEAVE A REPLY

Please enter your comment!
Please enter your name here